Waranqakta much'asqayki
Yupay ruru puquq mallki
Runakunap suyakuynin
Kallpannaqpa q'imikuynin
Waqyasqayta.
Dyuspa rampan, Dyuspa maman
Yuraq tuqtu hamanq'ayman
Yupasqalla qullpasqayta
Wawaykiman suyusqayta
Rikuchillay.
P'unchaw pusaq qiyantupa
Qam waqyaqpaq, mana upa
Qisaykikta "hamuy" ñillay
Phiñasqayta qispichillay
susurwana.
Mit'anmanta sananmanta
Tiqsi machup churinmanta
Llapa yalliq millaymana
Much'apuway yasuywana
Wawaykikta.
Sukhay sukhay waqachkaqman
sunqu qhiwi phutichkaqman
Kutirichiy ñawiykikta
Rikuchiway uyaykikta
Dyuspa maman.
K'anchaq p'unchaw tutayachiq
Killa paqsa rawrayachiq
Anqelkunap q'uchukunan
Hinantinpa rirpukunan
Kawsaq pukyu.
Qhapaqkunap Qhapaqninpa
Ñawpamanta wachaqninpa
Gracia suq'uq, aklla phuyu
Qampim suyan tiqsi muyu
Dyus kusichiq.
Huk simiwan huñispalla
Dyus churikta chaypachalla
Wiksaykipi runakachiq
Ukhuykipi kamakachaq
Runap marq'an.
Pukarampa qispi punkun
Awasqaykim, yupay unkun
Qamtam allwiqpaq akllarqan
Kikiykipitaq munarqan
Runa kayta.
Purum tasqi hupaykuyway
Dyus sisaq inkill wiwa
Maymantañach, Aquyayta
Usachiyman, qam mamayta
Qatachillay.
Chiqan p'unchawpa siqaynin
Hinantinpa suyakuynin
Qam millaqpaq ch'uqi illa
Mana yawyaq pampa killa
Dyuspa llaqtan.
Tukuy santokunamanta
Llapa Angelkunamanta
Supaypa umanta waqtan
Allpawan tupukta t'aqtan
sutillayki.
Runakunap munay kallcha
Pukay-pukay sumaq phallcha
sut'arpu tukuchiq khallki
T'itu wach'iq nawillayki
Qispi wampu.
May-may kamapas uyaylla
Qatiqiykipaq munaylla
Hatun sunqupas hayrampu
K'umuykuqkunapaq llamp'u
Wakchay khuya.
Qhapaq yayap khaynakuna
Yupay t'ika, akllakuna
Jesus puriqchiq uruya
Pillqu ch'antaq k'anchaq khuya
suyakunqay.
Kanki mama, kay pachapi
Ña wañuptiy huq pachapi
Kusikuyman thatkikunqay
Q'uchukayman yaykuykunqay
Qhapaq punku.
Qallu llullmiywan llullaspa
Pallqu kawsayman pupaspa
Muyupuwan ch'unku-ch'unku.
Chayñan maywaq intuykunku
Wantunqanpaq.
Yanapaway kallpaykiwan
Hinaspari wawaykiwan
Kay wakchaykip k'aynanqanpaq
Mana tukuq kawsanqanpaq
Atawchaway.
Tita yachaq, waqaychaqa
Qhapaq mikuy aymuranqa
Muchunqayta amachaway
Allin kaypi samachiway
Qispinqaypaq.
Dyus churipaq hinallataq
Santo Espiritu paqwantaq
Kachun gloriya, wiñayllapaq
Kawsaykunap, kawsayninpaq
Kusi kachun, Amen.
Dyusninchikmi, kikinpaq akllasurqanki.
(kuraq takinalla - tawantin takinamantam)
Runasimipi Willakuykuna, Qillqasqakuna
Native Traditions in the Postconquest World (PDF) - http://www.doaks.org/Native/trad14.pdf
Last update: Jan 8, 2004. © runasimi.de. The contents of this page may be distributed for non-commercial purposes, especially for spreading knowledge of the Runasimi language in the world and strengthening its position in its home lands. Please quote the original author (if not mentioned by name, write runasimi.de), and set a link to this page (write down URL, if texts or images of this page are used in printed version).